لو السكر غلي، هيحلوا بإيه؟
سيد الملاح هو المسؤول الأول عن المشكلة دي! مش هو اللي قال لنا وإحنا أطفال نشتري سكر، نشتري بفلوسنا كلها سكر...وإن أحلى شيء في الدنيا السكر حتى إنه استشهد بإبريق الشاي (لما العيل أبو شنب ابن اللذين قال لنا إنه معندوش بسكوت بالشيكولاتة وإن يمكن فيه عند البقال)!!! الكلام دة كان لازما وحتما يأثر فينا، لكن إنه يوصل للجماعة الأمريكان، دة كان شيء "لا يصدكه عكل" على رأي السيدة شويكار! السكر في بلاد العم سام بيتحط في كل حاجة بكميات مهووولة، مش معقول أبدا أنا وصديقة كفاحي في منطقة أندوفر شيماء نمسك كل نوع زبادي فوق الرفوف في السوبر ماركت عشان نعاير كمية السكر المضاف نقوم نلاقي إن حتى الزبادي السادة اللي بيسموه جريكي وهو شبه زبادي وزارة الزراعة عندنا، حتى دة مضاف له سكر!!! مش معقول كمان إن البيتزا والمكرونة والعيش والبقسماط وحتى المربى اللي مكتوب عليها خالية من السكر على الغلاف نلاقي في مكوناتها سكر، وكل الحاجات مضاف لها سكر، وكله كوم واللي حصل لي في كافتيريا مستشفى كنت بعمل فيها آشعة كوم...أدخل على الكافتيريا برجلي اليمين وأسأل عندك إيه يا ستي مش معلب؟ التونة معلبة، شوربة المحار فيها خنزير، السنوتشات جمبها بينز معلبة، اسمعي....ناوليني سندوتش خضار بالجبنة وخلاص عشان نبقى في الأمان، ييجي السندويتش المتين نايم فوق رقائق البطاطس المقرمشة...قوم فتافيت مرشوشة على البطاطس تلفت انتباهي فقلت يا بت دي تلاقيها جبنة بارميزان بس الواحد مش متعود على النضافة، بس لأ...البطاطس طعمها مسكر اممممم، أنتي يا ست أنتي، أنتم بتحطوا سكر على الشيبسي؟ الإجابة كانت بنعم!!! أنا اتعودت في إنجلترا على البطاطس اللي بيترش عليها خل لكن ماعندي استعداد أبدا إني آكل بطاطس مرشوش عليها سكر!!!
الجماعة بتوع الاقتصاد علمونا زمان إن السكر سلعة أساسية لا يستطيع الانسان الاستغناء عنها ولذا سعرها مش ممكن يغلى بدرجة إن الناس ماتقدرش تشتريها، لكن الدكاترة لهم رأي تاني، دكتور الباطنة طلب مني في تصريح مباشر ألا أتناول السكر أبدا ولما قلت له أنا باخد عسل بس، قال لي مه العسل برضه سكر، دكتور آخر قال لي إن نقص المناعة اللي عندي من ضمن علاجه التوقف عن تعاطي السكر، دكتور الأسنان طلب مني ومن أولادي أن نفر من السكر كما يفر الرجل من الأسد...طب وبعدين؟ ابني اللي بدلعه وأقول له "سكر سكاكر والاسم شاكر،" هيعيش إزاي من غير "سكرتي" و"بنبنتي" و"بسبوستي"!!! الشيكولاتة اللي بحنس بيها العيال فوق التلاجة مين هياكلها؟! الوضع متكهرب مش لأَنِّي بحب السكر بس لأَنِّي بحب البقلاوة المتنغنغة في العسل المعسل وبحب الشيكولاتة وبحب أغنية "أبريق الشاي" وشايفة إن واجبات الطفولة والعشرة بتحتم علي إني أشتري بفلوسي كلها سكر لأن الملاح قال إن أحلى شيء في الدنيا السكر حتى اسألوا أبريق الشاي
إيه رأيك يا عّم الأبريق؟!
