بصراحة عمل أصدقاء في بلد جديدة بيكون بنفس صعوبة عمل أصدقاء في مسقط الرأس، مفيش فروق كتيرة، إلا مشاعر القهرة اللي الواحد بيحس بيها وهو على الخط الأربعيني الفاصل بإن من كل الناس اللي يعرفهم في حياته طويلة، يا ترى مين منهم ممكن يلجأ له في وقت زنقة؟! ذكرياتي مع الصداقات: خروجات وقعدات وهدايا في سفر وأعياد ميلاد، كان فيه أوقات الصداقة كانت قايمة على المذاكرة أو الشغل أو الرسم والمزيكا....لكن الموقف اللي فتح عينية على إن صداقاتي غريبة ومش شبه الصداقات العادية هو يوم ما رحت أرسم بأسلوب الباتيك (ودة أسلوب معقد من الرسم يعتمد على تسييح الشمع ووضعه فوق طبقات اللون ثم كي القماش من الخلف فيسيح الشمع وتوضع طبقات جديدة من الألوان) في مرسم صديق فنان لأن ماما ماكنتش ممكن تسمح بالباتيك في البيت أبدا، بسبب كمية التعقيدات اللي فيه، وكان معانا صديق آخر فنان وعازف كمان، وبرغم إني كنت راحة للباتيك مخصوص إلا إنهم لما لقيوا العملية هتطول قلبوها قعدة تأليف موسيقي وهاتك يا عزف كمان على عود على دف...لما قلبوا دماغي! يومها حوض المرسم اتسد (مش متأكدة إذا كنت السبب بس احتمال كبير) ويومها برضه قررت أودع الباتيك للأبد!!! اليوم دة برغم ما كان يبدو عليه من ظرف، إلا إنه كان يوم غلس، وبرغم مشاركتهم في الباتيك شوية إلا إن كل واحد كان في وادي، والقصة دي بتلخص بمنتهى الصراحة حالي في كل الصداقات اللي قابلتها وعايشتها في حياتي!!
غير الوشوش اللي الواحد بيبدلها كل يوم عشان يقدر يتعايش، بتفضل في القلب غصة إني مقدرش أقول الحقيقة أبدا!! الأسباب كتير بتدخل في بنودها الذكاء الاجتماعي وأد إيه الحقيقة نفسها ممكن تخوف الناس مني جدا وتفقدني المزيد منهم! يا ترى قشور الصداقة ولا قلتها أحسن؟ أعتقد إن الكل متفق إن القشور أحسن من مفيش
لكن فجأة انقلبت الآية، رحت مكان ماكنش المفروض أكون فيه، وقابلت سيدة بالصدفة ماكنتش مفروض تكون هناك برضه، تجاذبنا أطراف الحديث وهوبا لقيتني مدعوة لجلسة نسائية قابلت فيها كل الناس اللي كنت بدور عليهم من زمان.....الغريب إن الوضع كان إني زي ما حسّيت إني كنت بتمنى أقابلهم من زمان، هم كمان كان عندهم نفس الإحساس، وبعدها ميت سؤال في قلبي لقى إجابة، وروحي وجدت فيهم من أوصانا الله أن نصبر معهم على ابتلاءات الحياة الدنيا فقال {وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ}. وبصراحة لو دي مش الصداقة اللي على حق، ممكن أمال تكون إيه؟!
عرفنا زمان إن المستحيلات في الدنيا تشمل العنقاء والخل الوفي، وأنا لسة بعتقد إن العنقاء مستحيلة الوجود، إنما الخل الوفي دة أمل كل إنسان وماقدرش أتصور إن ربنا يحرمنا من النعمة دي
رمضان كريم
