- تحبي تيجي معايا محاضرة في المركز اليهودي؟
- ...أنا بصراحة مشغولة شوية انهاردة!
- بس أنا معايا تذكرتين...
- طيب...حاضر...هاجي...
- دي محاضرة هايلة عن اليهود في عصر الرينيسانس!
- وماله...مايضرش.
دة كان الحوار اللي دار بيني وبين السيدة اليهودية التي تستضيفني عندها 3 أيام في الأسبوع بدون سابق معرفة وبدون مقابل (حاجة ماتطلعش من أجدعها نفر من اللي عرفتهم في حياتي)! المهم لبست واتأنتكت ولفيت فوق راسي الحجاب أبو سبع لفات وقلت أمري إليك يا رب...مش عايزة أكسفها بس. بصراحة العالم ماكانوش مقصرين...استقبلونا بترابيزات عليها مكعبات جبنة وبسكوت وفواكه كدة على قد ما قسم...وطبعا دخول المركز يستلزم تفتيش يصل لدرجة التفتيش الذاتي لكل المترددين على المكان سواء يهود أو غيرهم...والعدد في الحقيقة كان أكبر مما توقعت وضمت القاعة طوائف متعددة من الأشكيناس والسفاردي وتم تقديم الست الدكتورة تقديما هيأ الحاضرين لسماع معجزات التاريخ على لسانها!
الدكتورة اللي ألقت المحاضرة عشان متدينة بزيادة مغطية شعرها...ولابسة جوب...ولا تلبس البنطلون أبدا...دة غير بقى كل الحاجات اللي هتكلم عنها لاحقا...المهم....الست ألقت محاضرتها بطريقة أشبه بالسرد والأسلوب الحكائي فأسرت مسامع الناس وجذبت منتهى الانتباه عندهم....سقفنا سقفة كبيرة في الآخر وخرجنا من المركز بعد ما أثار شكلي واحد من اليهود الروس (بالرغم إنه قال إن روسيا تطلق كلمة روسي على ذوي العرق الروسي فقط أما غيرهم من الأجناس فلا يطلق عليهم روس وإنما عرقهم أو دينهم) وبعد أن جعل يحدق في إشي شوية...اقترب مني وقال: ممكن أسألك سؤال؟ السؤال دة يعتبر في أمريكا قانونيا غير صحيح إنما في روسيا عادي....قلت له يا عم اعتبر نفسك في روسيا واسأل...فطبعا سألني عن ديني...وعما إذا كنت يهودية...واضح إن الراجل كان شاكك في فقرر يقطع الشك باليقين
في مطبخ بيت مضيفتي حوضين وطقمين للأطباق وطقمين للمعالق وأداوات الطبخ وزيهم للحلل وكل الأواني...ودي حاجة في كل بيوت اليهود المتدينين....ليه بقى....لأن دة اللي يفرق بين استعمالات اللحم والفراخ وكل الحاجات التانية ... دة اسمه "كوشر." الطبق اللي يتحط فيه لحمة أو فراخ أو حتى أي كيكة مصنوعة من دهون حيوانية مش ممكن يتحط فيه خضار ولا رز ولا بيضة...ولا تتغسل الأطباق مع بعض ولا حتى في غسالة الأطباق!! أما اللحم والفراخ الكوشر لازم تذبح ومش بس كدة...لأ كمان لازم يراق دمها برش الملح عليها! والجماعة دول لازم ياكلوا سمك ذو زعانف وقشر وعشان كدة لا ياكلوا جمبري ولا كابوريا ولا استاكوزا...كله إلا الاستاكوزا يا جدعان (مع إني آخر مرة دقتها كان بداية العصر الحجري)!!
يوم السبت بقى...لا تفتح النور ولا التليفزيون ولا تطبخ ولا تركب مواصلة ولا عربية...من الآخر ماتعملش حاجة أبدا...وتكون طابخة من قبلها بيوم وفاتحة نور البيت كله من قبلها بيوم!! بس الصراحة الست اعترفت إنها ماعادتش تعمل كدة...مش بتسيب النور قبلها بيوم من ساعة ما كانت بتزور صديقتها المريضة بالسرطان وهي بتموت...وكان جوزها نسي يفتح لها التكييف من قبلها بيوم ويوم السبت جه عليها وهي تتصبب عرقا وألما...مضيفتي اللي كانت في زيارتها تأثرت بالحالة...فقررت تعمل الغلط وتفتح التكييف....وبعدين قالت لي: عارفة بيقولوا إيه؟ لما تعمل غلط مرة...تستمر فيه وتفضل تغلط مرة بعد مرة...وأديني أهه كل سبت بغلط وأفتح النور
ولأن الشيء بالشيء يذكر...أحب أنوه إن خيبة الناس السبت والحد...وإحنا خيبتنا ماوردتش على حد...كام واحد فينا بيصارح نفسه لما يخطأ؟
طب يعني إيه؟ الناس كلها تيجي أمريكا تتعلم إنجليزي وأنا أتعلم عبري؟ وبدل ما أقول good night أقول "ليلة توف"! وبدل ما أقول good morning أقول "بوكرتوف"؟ وحتى congratulations بقت "باروخاشام"! وأتعزم على حفلة بلوغ الحفيد المسماه "بارميتسفة" وعشان ماتربطش بكلمة ممكن مقدرش أعملها أقول "بالينادير" أعني بيها إني لو قدرت هعمل ولو ماقدرتش مفيش علي حرج!! دة كلام يا جدعان؟! وأعمل خناقة في السوبر ماركت وأقدم شكوى عشان مش بيبيعوا غير فراخ حلال ومفيش لا لحمة حلال ولا حتى كوشر يقوم السوبر ماركت يكلمني ويقول خلاص ماتزعليش هنجيبلك لحمة كوشر؟! ويطلع رئيس القسم اللي بشتغل فيه اسمه "تسڤي" بن ماعرفش إيه عربي إسرائيلي! ويوم ما صاحبتي تعزمني نروح مطعم إسرائيلي في منطقة كل سيداتها محجبات أو يغطين شعرهن بالبواريك ويرتدين التنورات ولا يرتدين البنطلونات أبدا وكل رجالها وأولادها يهود أرثوذكس ذوي لحى طويلة وسوالف أطول بقبعات سوداء يسكنون في حي لو رميت نفسك في منتصف شوارعه على الأرض يوم السبت لما أصابك مكروها لأنهم لا يفعلون أي شئ يوم السبت وحتى قيادة العربيات محرمة؟!
وكل دة وإيه، الست المضيفة تقول لي إن فيه ناس كتير في أمريكا بيمارسوا العنصرية ضد اليهود وإنها بتخاف لحسان حد يكسر لها إزاز عربيتها عشان علم إسرائيل اللي حاطاه فوق العربية....من كام يوم بنت الذين فتحت التلاجة لقتني حاطة علبة شوربة يتيمة جبتها من السوبر ماركت مكتوب عليها (وأظنهم غشاشين) شوربة كريمة استاكوزا، وعشان القر بس، النوع دة من الشوربة بيبقى واخد الريحة بس والله، تقوم الست تتعفرت وتبص عليها وتقول لي: الشوربة دي ماتتشربش في بيتي!!! قال إيه عشان الاستاكوزا وكل مثيلاتها من الكابوريا والجمبري والقواقع البحرية مش كوشر ومن المحرم أكلهم في اليهودية....طب هو أنا اللي هاكلها ولا هي؟! أنا والله ما كنت ناوية أديها حتى لو كانت اتحايلت علي..إنتوا عارفيني في الأكل
في الجامعة بقى عندنا، كل كام يوم واحدة تتصل تشتكي...وتطلب رئيس القسم والسكرتارية يحاولوا يهدوها ومش عارف إيه، ليه بقى بتتصل؟ كل كام يوم تقام ندوة أو محاضرة في القسم ورئيس القسم من ساعة ما اتعين وهو قرر يقدم مأكولات خفيفة بعد المحاضرات مثل البيتزا أو طبق جبن مشكل وفواكه أو سندوتشات كدة يعني....ليه وليه بقى القسم مايقدمش أكل كوشر؟! آه ليه؟ عشان الست اللي أصلا لا تمت للجامعة بصلة وبتحضر المحاضرات فقط عشان تاكل (وفيه زيها كتير) بتاكل كوشر بس فبتشتكي من كدة؟!!!
ناس كتير مش فاهمة يعني إيه كوشر والكوشر دة في اللحم أو الفراخ يعني تم ذبح وإراقة دم الحيوان ورش الملح عليه في مكان وطريقة تم الموافقة عليهما من قبل رجال الدين اليهود، ولا يصح لهذا المكان معاملة اللحوم بكافة أنواعها بأي آداة أو في أي إناء يتم فيه معاملة الألبان أو غير اللحوم، طب حد هيسألني على السمك، وهقولكم إن عليه كلام السمك دة، بعض الفقهاء قالوا لحمة وبعضهم قال يمشي في السكة التانية وأنت وضميرك...طب والخنزير...حرام...
والجندوفلي وكل ما سبق ذكره من غير الأسماك ذات القشور حرام....والشوربة المسكينة بتاعتي كانت حرام
لسة بقى فيه عيد هيهل علينا بتاع أكل العيش اللي يكون لسة مااستواش لأن لما اليهود جم يخرجوا من مصر بحسب العهد القديم وفي سفر الخروج تقريبا، ماكنش لحق عيشهم المخبوز يقب...واحتفالا بهذه الأيام تبيع المصانع المتخصصة خبزا مبططا غير ناضج تمام النضج وكل سنة وأنتم طيبين....على كدة المصريين بيحتفلوا بالعيد دة كل يوم لأن دائماً عيش الفرن مبطط وملبد وغير ناضج والله!
الواقع إن إنهاردة كان فيه محاضرة عن اليهود الطلاينة في بلاد المهجر عاملها المركز الإيطالي بالجامعة وكالعادة كنت مدعوة وقلت يا بت كلها ثقافة، لكن يدوب جاية أخرج من باب المبني اللي أنا فيه وأتوجه للمبنى التاني، لقيت لفة شيك كدة ظريفة بتندهلي...بضرب بعيني جوة المكتبة لقيت محاضرة....أنا قلت أروح أتثقف بعيد ليه لما الثقافة كلها جمبي هنا؟! المحاضرة عن إيه يا بنتي؟ عن التوسع العمراني في السعودية على حساب المباني التاريخية؟ طب ثقافة دي ولا مش ثقافة؟ وبعدين مافيهاش حاجة لما نتثقف وبعين نحبس بسندوتش....قلتلي مالها السعودية بقى؟!
ليست هناك تعليقات:
إرسال تعليق