النوبة

النوبة الجديدة

الجزء الأول

- يا عم أشرف أنا معرفش مين النوبيين أصلا تقول لي اعملي الماچستير بتاعك عن النوبة؟! 
-ما أنا هقعدك مع ماما! 
-ماما نوبية؟
-لا ماما مش نوبية، احنا عرب عليقات 
-يا لهويييييييي

دة كان الحوار اللي دار بيني وبين صديق الدرب والكفاح الفنان الكبير أشرف عبد العظيم لما كنت بسأله عن أفكار لرسالة الماچستير اللي كان لازم اكتبها كي احصل على درجتي العلمية الأولى في المجال....قد ايه كنت جاهلة وعبيطة...

المشهد التاني كان بعدها بسنين كتير، كنت خلصت الماچستير الأولاني وكتبت الرسالة عن النوبيين المقيمين في القاهرة لكن لما جيت أعمل الرسالة للماچستير التاني، قررت إني هسافر وادي جهنم (ودة كان اسم المكان اللي بنوا فيه النوبة الجديدة أو نوبة التهجير) مهما حصل...وهنا بيبدأ المشهد التاني وأنا في قطر النوم المتجه لأسوان بعد ما شوية صيّع شالوا القضبان في محطة قبل سوهاج بشوية (عشان بت عبيطة هربت مع حبيبها أو اللي فاكراه حبيبها وأهل البت عايزين الحكومة ترجعها هأوووو) وسابوني متعلقة في القطر لمدة ٨ ساعات 😭

لما قررت انزل من القطر عشان اركب ميكروباص لأسوان مكتظ بالناس مع اتنين من أطفالي لمدة ٦ ساعات من مطرح وقوف القطر لأسوان في شهر أغسطس، كان بسبب العيال المجرمين اللي قعدوا يحدفوا طوب ع القطر اللي واقف وأكيد برضه بسبب فقدان الأمل في إن القطر يتحرك لا للأمام ولا للخلف....وكان!

من أسوان ركبت للنوبة، بس مش النوبة الحلوة دي بتاعة الصور والخواجات، نوبة التهجير، ولما وصلت ابتدت حكاية حياتي...

الجزء التاني

قرية أبو سمبل في نوبة التهجير

قبل ما أروح النوبة كنت بدأت دورس الرطان بتاع الفادكات....والرطان دة اسم اللغة واعتقد إن المصريين هم اللي سموا اللغة النوبية بالاسم دة لأنهم سمعوا النوبيين بيتكلموا لغة مش مفهومة عندهم فقالوا عليهم بيرطنوا....

وقبل ما ابدأ اتكلم عن رحلتي إلى النوبة وبحكم تخصصي في الثقافة النوبية وبصفتي كمان لُغوية linguist يعني، لازم ناخد فكرة الأول عن النوبيين. الجماعة الحلوين دول كانوا قديما يسكنون الأرض الغارقة تحت بحيرة ناصر دلوقت، ودي طبعا كانت أرض لوز، جنة، نيل وميّة، مراكب جاية من السودان محملة بالبضائع...منقسمين لقبيلتين الفاديكات (ودول بيعتقدوا إنهم النوبيين الأصليين سليلي الملوك وكدة ودول كانوا يسكنون الجنوب) والكنوز أو المتّوكيين (ودول تبع حاكم كان يسمى كنز الدولة وكان من ذوي السلطة وكدة) وكانوا يسكنون الشمال والقبيلتين دول لغاتهم ولو إن فيها متشابهات إلا إنها مختلفة...سكن جوارهم وخد منهم وتزاوج معهم بعض القبائل العربية الأخرى القادمة من الجزيرة العربية زي العرب العليقات، المنتمون أصلا لبني عقيل والجعافرة، بس القبائل الأخرى ليس لديها لغات سوى العربية. النوبيون الأوائل من ساكني النوبة القديمة ولحد يومنا هذا كبار السن ممن نزحن إلى النوبة الجديدة لا يتحدثون العربية وإذا تحدثوها فبلكنة واللكنة يا أفاضل معناها إن المتحدث يتقن أكتر من لغة فالتريقة عليهم في الأفلام الهابطة كانت مجرد قصر ديل وجهل بيّن.

سافرنا عند الفاديكات في قرية أبو سمبل وبدأت المغامرات...

كنت "جورباتيّة"وعارفة إنهم هيطلقوا علي هذا اللقب وأنا وسطهم وعارفة إني بيجري في عروقي دم مخلط متعدد الأجناس مش دم صافي زيهم...عارفة لوني وملامحي هيكشفوني...بس عشت معاهم في بيوتهم...كلت أكلهم، نمت في فرشتهم وشربت من ميّة زيرهم ولبست الزِّي الرسمي بتاعهم....مين عارفة اسمه ايه؟؟

الجزء التالت

الزي الرسمي

لما جيت أسافر النوبة كنت واخدة معايا جلاليب خروج (قال يعني هحاكي المجتمع هناك) وكنت فاكرة إني تمام أوي كدة هناك...لابسة بقى ومتشيكة واجي خارجة من البيت....وقفتني ست البيت وقالت: هتخرجي كدة؟! بصوا بناتها حولية لبعضهم بابتسامة لا تخلو من الاستنكار وقالوا: لازم تلبسي الچرچار!

وأنا اللي كنت فاكرة نفسي بقى ايه قلت بس تلاقي الچرچار دة حاجة ساترة بقى زي الملس ولا العبايات التقيلة....طلع بتاع كدة كله دانتيلا مفرغة لا بيستر ولا بيداري تلبسه فوق جلابية النوم وتنزل الشارع كدة عادي تبقى في السليم....لأ له لازمة بصحيح 😂. سمعت على هامش الموضوع دة ان الحكومة نزلت قرار مخصوص خاص بالمدارس في النوبة يمنع المدرسات في المدارس من لبس الچرچار (وهنا افتكرت الطلاب اللي كانو ينزلوا المحاضرة بالشبشب والبيچاما في الجامعة لأنهم ساكنين في الدور اللي فوق القاعة)! تتمشى بقى ستات القرية بالچرچارات بتاعتها ساعة المغربية وكل واحدة بقى وشطارتها في شياكة چرچارها وتمشي الست منهم والبتاع دة بيهفهف وراها يا جماله ....

الحياه في النوبة هادية ومريحة للأعصاب برغم الحزن اللي جواهم...قعدتي على الحصيرة قدام البيت بكوباية الشاي في عز حر أغسطس في منطقة كان اسمها وادي جهنم كانت بالدنيا واللي فيها...منتهى الصفاء والبراءة والأصالة من الجدة اللي مصممة تتكلم نوبي مع أحفاد بيفهموا ومايتكلموش وبنت الحفيدة اللي الجدة مسمياها نادرين....(نادرين العودة للنوبة القديمة)....

هناك تحس بمنتهى الأمان بجد منتهاه وبرغم اني غريبة وانحطيت مع ناس لا شفتهم قبل كدة ولا شافوني إلا إني كنت واحدة منهم بجد وكانوا بيعاملوني كدة فعلا...الضهر لازم الكل ينام هربا من قسوة الحرارة...وبالليل الستات تفرش قدام البيوت والرجالة تروح القهوة أو مركز الشباب...ناس تيجي تاخدني اشوف اليبي الجديد لأم لسة والدة والعادة هناك إن الزائر لازم يحطوله نوع من أنواع الكلونيا باينه الدلكة (اسمه ايه البتاع دة يا كوثر؟)...يا عم والنبي خلاص...يا عم والله بستحرم أحط ريحة...غصبن عني يتحط لي....

الحتة اليتيمة اللي فيها مرجيحة يتيمة بيعتبروها ملاهي واسمها "كراميش" فضل ابني يحلم باللي ممكن يلاقيه في الكراميش دي لحد ما رحنا ولقيناها مقفولة للإصلاحات هع هع هع!!!

معظم رجالة أبو سمبل في الخليج ودة كان حال معظم رجال النوبة من قديم الزمان...الراجل دايما ينزح للعمل برا النوبة ويسيب الست تشيل الليلة...وعشان كدة الستات في النوبة ستات من نوع خاص...الست صلبة قلبها زي قلب الأسد معندهاش هيام ودلع وكلام من دة من قسوة الأيام عليها، عندها مسؤولية كبيرة وهي تربية الأبناء ودة الشغل الشاغل في الحياه وعليها السلام.

القوانين للجواز والشبكة والجهاز تسن في القرية في أماكن مخصصة لاجتماع كبراء للقرية عشان مفيش راجل نوبي يعلي على أخوه في مهر أو شبكة...التعريفة لازم تكون موحدة، ودة قمة في التنظيم المجتمعي...

الجزء الرابع

الدخان

-يا بت محدش يعمل دخان في الصيف!
-لا أنا مصممة....لازم أعمل....لازم أعيش التجربة لحد الآخر

وتيجي معايا أم نادرين عند الست اللي بتعمل الدخان بعد كام بيت وراهم....ونبقى ساعات! والدخان دة عبارة عن رسم بالحنة على أجزاء من الجسم والقدمين وبعد ما يتساب يجف تتم إزالة الحنة عن طريق الفرك بالكامل....بعد كدة يشعل الحطب لحد ما يطلع دخان من النار الموهوجة وتُخْمد النار وتنزل صاحبة السعادة مع الدخان تحت بطانية صوف تقيلة عشان يتمكن من الجسم ولا يروح شمال ولا يمين....تخرج الست بعد كدة والحنة رسمها تقيل وثابت ولونها قوى يفضل شهور بس بصراحة ريحتها زي ما تكون خارجة من حريقة! ولأن الدخان دة أساسي في الأعراس وكدة لازم الست من دول تدهن جسمها بمجموعة من الزيوت العطرية اسمها الخُمرة...ووقتها بس تبقى ريحة الدخان في الدوبان 😄

طبعا في حالتي ماكنش فيه خُمرة، وطبعا كدت أن أذوب من حرارة أغسطس والنار اللي قعدت فيها بس كنت خارجة من بيت الست في غاااااية السعادة زي اللي خارجة من حريقة صحيح بس اللي خارجة وهي سايبة الدنيا وراها تولع...احساس غريب الدخان دة وتجربة مثيرة!

الجزء الخامس

الأبريه

أول ما وصلت النوبة في رحلتي الأولى وبعد نص ساعة من استضافة ست البيت لينا، اعتذرت قائلة: اسيبكم ترتاحوا عشان أروح لجارتي نعمل الأبريه!

أبريه ! الأبريه دة يطلع ايه؟

هي طبعا سابتني في حيرة وراحت لجارتها بس أنا طلبت منها في اليوم التاني تاخدني معاها وفهمت إن الأبريه دة بيتعمل من قبل رمضان بشهر استعدادا له، وإن عشان صعب يقوم به بيت لوحده، تشترك كل الجارات في عمل الأبريه عند فلانة، وبعدين كلهم مع فلانة يروحوا يعملوا الأبريه عند علانة وهكذا دواليك. والأبريه دة عبارة عن رقائق هشة جدا من عجين مختمر تمام الاختمار، بعد الخبز على الصاجة توضع الرقائق فوق بعضها ويبدأوا يكسروها للاستخدام، وفي رمضان يضاف الأبريه لعصير الليمون أو الميّة بسكر أو أي عصير ويؤكل بكثرة لتحسين الهضم، وتتم معاملة الأبريه زي الدهب بالظبط...مثال صغير: ست البيت اللي كنت فيه كانت مخبية الأبريه عن بناتها في بيت تاني خوفا منها إنهم يخلصوه قبل رمضان...مشكلة كبيرة!

طبعا مافتنيش الموضوع دة والأبريه بقى على سفرتي كل رمضان...في الأول كان صعب على جوزي تقبله بس بعد كدة بقى يسأل عليه 😂

أما الأكلات التانية اللي بتشتهر بيها النوبة هي العصيدة اللي بتتعمل من عيش الدوكة (عيش على الصاج) والزبادي والعسل على هيئة طبقات، والإتر اللي بيتعمل من أي ورقيات زي الملوخية أو السبانخ وأثناء الطهي يتفرك بآداة اسمها المفراك لا يخلو منها أي بيت نوبي ودي بقى بتخرط الملوخية بس مش قبل طبخها، أثناء طبخها...وأهم حاجة إن عيش الدوكة بيتخبز تقريبا مع كل وجبة في كل بيت طازا...ونظام الأكل للضيوف الغربا (الجوربتية من أمثالي) إن الأكل يتحط على الترابيزة أو المكان المخصص والضيوف تتساب لوحدها تاكل 😕!!! دة كان غريب جدا بالنسبة لي وكنت محرجة وتقريبا عبرتلهم عن شعوري...فقرروا يعتبروني زيي زي كل الجيران والضيوف من القرية وهنا الوضع اختلف بوضع الطعام على الأرض بقى في صينية كبيرة وأي حد موجود يمد ايده وياكل في صحن واحد كبير للكل 😊

الخضار والفاكهة في النوبة نادر جدا ودة لأن السوق مرة واحدة في الأسبوع بس لمعظم القرى وإلا تضطر الست من دول إنها تروح قرية تانية ودة صعب، والندرة دي بتخلي التعامل مع الأكل بحرص وبيصعب الحياه هناك أكتر...

لما سبتهم آخر مرة سبت قلبي عندهم ووعدتهم باللقاء وكنت فعلا هسافر لما الجدة تعبت جدا لكن وافتها المنية قبل معاد سفري بكام يوم 😢

الجزء السادس

النوبكمان وكمان

أكيد في ناس ادوّشت وأنا بتكلم عن النوبة كتير بس أعمل ايه، روحي متعلقة بيها وصحابي النوبيين أكتر من الجوربتية...

المهم....ماقدرتش أقفل باب النوبة من غير ما أقول إن كوني جورباتية صعب علي الدراسة بشكل قاسي، وعم جدكاب وقفني قدامه مرة غسلني وقال لي: تعرفي إيه إنتي عن معاناة النوبيين عشان تكتبي عنهم؟! روحي شوفيلك حاجة تانية اعمليها! وأثناء كتابة الرسالة الأولى رفض النوبيون المعنيون بملء الاستبيان المشاركة وبقيت أتحايل عليهم وألف على كل جمعية لقرية نوبية اقدر أوصل لها (لكل قرية من ال ٤١ قرية نوبية جمعية تحمل اسمها في القاهرة) وبعد كل المحاولات كلمت أشرف صديقي وعيطت بس حتى أشرف وقتها ماقدرش يساعدني...وبعد وصولي لليأس التام ظهرت لي كوكي حبيبتي اللي عملت معايا fair deal بإني أساعدها تلاقي دراسات في مكتبة الجامعة على إنها تتولى موضوع ملء الاستبيانات وفعلا دة اللي حصل 😊😀...وعشان كدة كوكي حبيبتي بقت الصديقة المتوكية اللي معملتش على قبيلتها رسالتي التانية 😉

في جمعية أبو سمبل بالقاهرة، عابدين بالتحديد، قابلت زعيمة الزعيمات السيدة مديحة محيي الدين شريف بنت الفنان الراحل محيي الدين شريف مصمم شخصية بكار وهي اللي سهلت لي عملية المعيشة في النوبة فيما بعد، أخدت دروس اللغة النوبية على يد الأستاذ شريف نور ودة كان عامل مهم جدا في دراستي اللغوية، وقابلت الأستاذ الكبير مصطفى جاسر أكتر من مرة نتحادث ونتناقش في الثقافة النوبية، وفي النوبة نفسها قابلت د أحمد سوكارنو الأستاذ الدكتور في علم اللغويات بجامعة جنوب الوادي...وقبلهم قابلت مجموعة عريضة من المثقفين والكتاب النوبيين زي يحيى مختار كاتب "مرافيء الروح" ومحيي الدين صالح كاتب لأول كتاب باللغة النوبية منذ قرون (اللغة النوبية كلغة مكتوبة توقف استخدامها من قرون فعلا)...وكانت القاعدة بتحلو دايما على كرسي خشب في قهوة جمب عمارة استراند قدام كوباية شاي إزاز بتعوم فيها مراكب الذاكرة لسنين بعيدة قبل ما تغرق النوبة الحقيقية!

وبعد حصولي على الماچستير التاني وبعد سنين من معرفة أشرف صديق الكفاح والنجاح، قرر في يوم إني أستاهل هدية كبيرة...فجاب لي كتاب "الشمندورة" وقال لي: أنا عارف دلوقت بس ممكن تقريه وتقدريه!

#بنت_بطوطة