نويبع
عشت في نويبع فترات متقطعة لدرجة إني كنت بدأت بالفعل الانتقال الكلي إلى هناك من مدارس وبيت وعمل وخلافه...
نويبع بلد تتعلم فيها إن السمك اسمه "حوت"مهما صغر حجمه والفعل اصطاد/ يصطاد مش موجود في المفردات النويبعية بيحل محلها حوّت/ يحوّت! تاكل في نويبع أطعم سمك في مصر معمول بخلطة تشمل طحن البصل والتوم والكمون والتوابل ونفس الخلطة تضاف للرز ويتقدم الاكل في البيوت في صينية كبيرة كدة تملى العين والخاطر ليس للمعالق فيها مكان والأكل بالايد بيدي الأكل حلاوة وطلاوة 
😉
😉
اتعلمت في نويبع إزاي استمتع مع صديقاتي البدويات بدون وجود الأزواج والخروجة الأهم عندهم هي الذهاب لشاطئ اسمه "المحاش" ونزول البحر بجميع أنواع الملابس إلا لباس البحر (اللي كنت فاكرة إني مقدرش أعوم من غيره) والطبخ على الشط في الرمل كدة باستخدام أعواد الحطب وحلة كبيرة يدخل فيها سمك مملح مقدد كدة (بينشفوه في البيوت) مع الرز والبطاطس والطماطم والله يا "يُومة" (ماما عندنا) على أكلك...
في نويبع انت والبحر وبس متقوليش بقى عايز آكل خضار إلا لما يبجي من العريش مرة في الأسبوع ولا آكل لحمة إلا لما يكون فيه عرس ولا فاكهة ولا حلويات ولا الكلام الفارغ دة...في نويبع تتعلم تعيش على القد ضمن خيارات قليلة للغاية!
في نويبع الجمل يتمشى براحته في الطرق وانت تاخد بالك من الطريق ومنه طبعا...الخبز تعمله الستات في البيوت على الصاجة الخبز كل وجبة طازا واللي شبه بتاعنا تعمله العرايشية...
في العيد كل الستات تلبس ملابس بيلبسوها شخصيات ألف ليلة وليلة بس بيبقوا في غاية الأناقة والتميز....كل الناس (كلهم) يتزاورون ويفضلوا يروحوا من بيت لبيت أما شباب قبيلة "الترابين" يروحوا عند قبيلة أخرى "الموذينة" يعاكسوا القمامير هناك لأن نساء وبنات "الترابين" ممنوعات من الخروج إلا في حمى الرجال ولو خرجن لوحدهن في نزهة أو إلى "المحاش" وخلافه وحد اتعرض لهن يدفع غرامة ويتبهدل...
البدو في نويبع مجتمع محافظ لكن مفرفش إشي لبس ألف ليلة وإشي أغاني خليجية وإشي سباحة نسويّة بس الست هناك متديش نمرتها لغريب ولا حتى ليّ وما تسوقش عربية ولا تخرج تقف حتى قدام بيتها ولا ينفع يكون عندها فيس بوك ولا حتى تويتر!!! طبعا أنا بروح أعفّر بالفور باي فور وأعمل add لمعارفي من البدو الرجال وأفضل راحة وجاية من عند البقال طول اليوم وأوّقف عربية الخضار اللي جاية من العريش بنفسي وأدوّر في الشوارع على فردة جزمتي اللي خدها الكلب من قدام البيت...لأ وكمان لما حد من العيال يضايقني أدخل على مقعد الرجال اشتكي!
كان صعب جدا علىّ أعيش كبدوية من الترابين ولو إنها تجربة مثيرة بفكر فيها كتير 😉
😉
ليست هناك تعليقات:
إرسال تعليق